Pantun Tuha Lam Lajang

Kuneng-kuneng pade dalam blang

Tapi that sayang ka tulo pajoh

Umu katuha hudep lam lajang

Cukop that malang judo hantom troh

Di pot angen cot uro timang

Ji poe selayang u langet tujoh

Mebagoe cara kalheh lon paban

Peut boh tunangan ban bandum putoh

Kilat geulanteue meurek-rek awan

Silat oh lhehnyan ujeun pih ji toh

Janji jeulame yoh awai lapan

Sibeuleun lhehnyan meutuka siploh

Ji toh le ujeun hana ji pirang

Leupah that sayang ureung meulampoh

Haek lon pike ulee lon mumang

U bak yah tuan lon lakee tanggoh

Pane ji timoh si aneuk bayam

Jareung ta siram baja tan taboh

Menyo kapeugah keubit lageenyan

Di kah hai agam peutak beu jioh

Neuk jak u sigli ka rhot u calang

Suwah lon riwang arot meulaboh

Ka grak teukeudi bak sidroe Tuhan

Reuoh bak badan han soe sampoh

Penulis Mustafa Ibrahim Delima Mahasiswa EKP FE Unsyiah

Ditulis Ulang Oleh Abdul Mujala Mahasiswa fkip unsyiah